ភ្នំពេញ៖ ក្រសួងទេសចរណ៍បានសម្រេចអនុគ្រោះលើការពិន័យអន្តរការណ៍ជាប្រាក់ចំពោះការហួសសុពលភាពអាជ្ញាបណ្ណមគ្គុទ្ទេសក៍ទេសចរណ៍គ្រប់កម្រិតរហូតដល់ថ្ងៃទី៣១ ខែធ្នូ ឆ្នាំ២០២២។ ការលើកលែងនេះដោយថា ជាការលើកទឹកចិត្ត និងជំរុញការត្រៀមខ្លួននៃវិស័យទេសចរណ៍សម្រាប់ឆ្នាំ២០២៣។
ក្នុងសេចក្ដីជូនដំណឹងចុះថ្ងៃទី១១ ខែសីហា ក្រសួងទេសចរណ៍បានជំរុញដល់មគ្គុទេសក៏ទេសចរណ៍ដែលផុតអាជ្ញាបណ្ណទាំងអស់អាចមកដល់ពាក្យស្នើសុំអាជ្ញាបណ្ណឡើងវិញបានដោយពុំមានការបង់ពិន័យចាប់ពីថ្ងៃនេះរហូតដល់ថ្ងៃទី៣១ ខែធ្នូ ឆ្នាំ២០២២ នៅតាមមន្ទីរទេសចរណ៍រាជធានី ខេត្តទាំងអស់។
ក្រៅពីអនុគ្រោះពិន័យសពុលភាពអាជ្ញាបណ្ណក្រសួងក៏ផ្ដល់ការលើកលែងការស្នើសុំលិខិតបញ្ជាក់សុខភាព ដោយយកជំនួសវិញនូវលិខិត ឬកាតបញ្ជាក់ការចាក់វ៉ាក់សាំងកូវីដ-១៩ គ្រប់ដូស និងដូសជំរុញ ដោយចាប់អនុវត្តពីថ្ងៃចុះហត្ថលេខាដល់ដល់ថ្ងៃទី៣១ ខែធ្នូ ឆ្នាំ២០២៣។
គួរឱ្យដឹងផងដែរថា រដ្ឋាភិបាលបានជ្រើសយកឆ្នាំ២០២៣ ជាឆ្នាំជំរុញទេសចរណ៍ទាំងផ្ទៃក្នុង និងមកពីបរទេស ស្របពេលដែលកម្ពុជានឹងធ្វើជាម្ចាស់ផ្ទះនឺងការប្រកួតកីឡាស៊ីហ្គេម និងប៉ារ៉ាអូឡាំពិកហ្គេម៕
